Territorio
O goberno municipal de Teo fixou como unha das súas prioridades para a lexislatura 2007-2011 o desenvolvemento de obras de saneamento e abastecemento de auga para garantir o acceso de toda a veciñanza a estes servizos básicos.
Con este obxectivo contratouse a redacción do Plan Director de Saneamento e Abstecemento que vai determinar as características e a idoneidade da rede existente e tamén dimensionará e definirá as necesidades de saneamento e depuración de todas as zonas do concello, ademais de trazar sobre plano a rede municipal a executar nos próximos anos.Outro campo prioritario na actuación da concellaría de Urbanismo, Vivenda e Infraestruturas é o do mantemento da rede de estradas.
Na recollida de residuos sólidos urbanos o goberno de Teo velará polo cumprimento dos compromisos contractuais das empresas concesionarias, mediante a definición e a publicitación dos días de recollida en cada unha das zonas, as datas de limpeza dos colectores e a periodicidade das mesmas; así como as condicións de recollida de voluminosos e o incremento dos colectores.
Un dos complementos máis necesarios para as medidas antes citadas é a ampliación do servizo de limpeza viaria, estendido dende febreiro de 2008 ás novas zonas urbanas e aos núcleos das parroquias.
Dende a área de Urbanismo trabállase coa intención de axilizar a posta en marcha do polígono industrial e dotar o concello do solo preciso para servizos básicos coma o novo centro de saúde, o centro de día para as persoas maiores ou as vivendas de aluguer para a mocidade.
